Ndërkohë që vendi po përballet me flakët, sërish politika nuk ka ndenjur larg. Kryetari i Partisë Demokratike, Lulzim Basha ka akuzuar kryeministrin Edi Rama ka shfrytëzuar fondet e Emergjencave Civile, ndërsa vetë udhëton me helikopterin e ushtrisë.
Mirënjohje për punonjësit e emergjencave civile dhe forcat e ushtrisë që po përballen me flakët përgjatë këtyre orëve të vështira. Pamjet që i shfaqin teksa luftojnë me mjete rrethanore janë sa pikëlluese po aq sa indinjuese kur shohim se në të njëjtën ditë, Edi Rama, i heq përballjes me zjarrin helikopterin e ushtrisë, për ta përdorur për udhëtimet e tij.
Natyrisht, kërcënimi i zjarrit është i kudondodhur në rajon, por nuk ndodh askund që në një moment krize, mjetet e pakta të mpaken edhe më shumë për t’i shtuar privilegjet një individi. Kjo nuk është papërgjegjshmëri, por modeli me të cilin është keqqeverisur dhe varfëruar vendi. Prandaj nuk ka fonde dhe mjete për t’u përballur me emergjencat, qofshin zjarre apo tërmete, sepse shteti përdoret si instrument i një pakice që punon për vete, jo për qytetarët”, shkruan Basha.
Ministri i Mbrojtjes, Niko Peleshi duket se e ka harruar që një person ka ndërruar jetë ditën e djeshme në Gjirokastër. Ai sot ka publikuar foto nga një “natyrë e qetë”, duke portretizuar një situatë të mirë, ndryshe nga çfarë raportohet nga terreni.
“Dielli lind përsëri në Gjirokastër. Pas një nate mes zjarresh, falë punës së palodhur dhe me sakrifica te Forcave të Armatosura, forcave zjarrfikëse dhe forcave të tjera të Bashkisë Gjirokastër, vatrat e zjarrit janë eliminuar. Vazhdojmë vigjilencën dhe kërkojmë bashkëpunim komunitar për të identifikuar zjarrvënësit e qëllimshëm”, shkruan Peleshi.
