Gjatë 24 orëve të fundit janë regjistruar 24 vatra zjarri, të cilat janë shuar plotësisht. Zjarret janë shfaqur në bashkitë e Vlorës, Vaut të Dejës, Malësisë së Madhe, Rrogozhinës, Durrësit, Fierit, Kuçovës, Lezhës, Kurbinit dhe Hasit.
Më së shumti, flakët kanë përfshirë zona me bimësi të dendur, duke djegur rreth 9 hektarë shkurre dhe barishte, si dhe 200 rrënjë ullinj në fshatin Frakull, në bashkinë Fier.
Në dy raste të veçanta, zjarri ka përfshirë banesa: një në fshatin Zagorë të Malësisë së Madhe dhe një tjetër në një shtëpi të braktisur në zonën “Mali i Kolajt” në Velipojë, ku dëmet kanë qenë vetëm materiale.
Për shuarjen e flakëve janë angazhuar 32 automjete zjarrfikëse dhe 223 punonjës të forcave të emergjencës.
Sipas parashikimeve të Institutit të Gjeoshkencave, për sot pritet që niveli i rrezikut nga zjarri të jetë “I LARTË” në qarqet Lezhë, Durrës, Tiranë, Berat dhe Fier, ndërsa në qarqet e tjera rreziku do të jetë “I MODERUAR”.
Gjithë sistemi i mbrojtjes civile ndodhet në vigjilencë dhe gatishmëri për të reaguar menjëherë nëse situata kërkon ndërhyrje.
Kujtojmë qytetarët që, në këto ditë me temperatura të larta dhe rrezik të shtuar për zjarre, të tregojnë kujdes maksimal.
Duhet të shmangen veprimet që mund të shkaktojnë flakë, si ndezja e zjarreve në ambientet e hapura, djegia e mbetjeve apo hedhja e materialeve të ndezshme në natyrë.
