Në lidhje me situatën kaotike dhe rradhën e madhe për të hyrë në shtetin fqinj Greqi nëpërmjet pikës kufitare të Kakavijës ka reaguar edhe konsulli shqiptar në Janinë Eltjon Vërleni në Janinë.
Në një deklaratë për mediat Vërleni tha se situata është e jashtëzakonshme dhe se po punohet për shtimin e personelit në sportelet e pikave kufitare dhe vazhdimin e punës edhe gjatë natës.
“Duhet të mundësohet hapja e kufirt gjatë natës. Shpresoj që të ndodhë kjo gjë gjatë ditës së sotme. Jemi prej tre ditësh në negociata me palën greke. Shpresojmë që deri në orën 22:00 të kalojnë të paktën 4 mijë qytetarë. Jemi në negociata me palën greke edhe për shtimin e mjekëve apo të sporteleve. Deri tani, situata është e jashtëzakonshme. Qeveria greke ka marrë masa të jashtëzakonshme për këtë pandemi. Janë gjashtë persona që po kryejnë tamponët nga pala greke. Prej ditës së hënë do kalojnë vetëm 750 persona dhe nga pala greke kjo është dhënë përfundimtare,”- tha konsulli shqiptar.
Ndërkohë Vërleni tha se kemi kërkuar edhe staf mjekësor në doganë, pasi mes qytetarëve që presin ka edhe të moshuar me probleme shëndetësore.
