Sekretari i Përgjithshëm i OKB-së, Antonio Guterres, ka ngritur alarmin për krizën humanitare në Gaza, duke theksuar se ndihmat që po mbërrijnë janë të pamjaftueshme.
Ai bëri me dije se rreth 400 kamionë me ndihma janë lejuar të kalojnë përmes pikës kufitare Kerem Shalom, por vetëm një pjesë e vogël e tyre, 115 kamionë kanë arritur realisht në territorin e Gazës.
Sipas Guterres, asnjë furnizim nuk ka arritur në pjesën veriore të enklavës, e cila është e izoluar dhe më e prekura nga kriza.
Ai shtoi se OKB-ja ka mundur të shpërndajë disa lloje ndihmash emergjente, përfshirë miell, ushqime për fëmijë, suplemente ushqimore dhe ilaçe, ndërsa disa furra buke janë rikthyer në funksion në jug dhe në qendër të Gazës.
Megjithatë, Guterres paralajmëroi se këto përpjekje janë larg së qenuri të mjaftueshme:
“Ndihma që po lejohet aktualisht është sa një lugë çaji në një kohë kur kërkohet një përmbytje ndihmash”, deklaroi ai, duke kujtuar se gjithçka po ndodh në kushtet e një operacioni ushtarak aktiv.
