Në Shtetet e Bashkuara të Amerikës numri i rasteve të reja me Covid-19 e ka kaluar shifrën prej 10 milion që nga fillimi i pandemisë, ndërkohë janë regjistruar 247.519 vdekje.
Nju Jorku është një ndër 5 shtetet më të prekura nga pandemia dhe numëron 116.590 raste aktive me koronavirus dhe për t’i paraprirë një vale të dytë janë vendosur disa masa të reja kufizuese.
Guvernatori AndreW Cuomo njoftoi se baret, restorantet, dhe palestrat duhet të mbyllen në orën 10:00 të mbrëmjes dhe nuk do të lejohen grupimet me më shumë se 10 persona.
“Po shohim një rritje globale të rasteve me koronavirus dhe Nju Jorku është përballë baticës së COVID-it. Ne po përballemi me shifra rekord në shtetin tonë. Situata është duke u përkeqësuar shumë çdo ditë”, tha Cuomo.
Kryebashkiaku i Nju Jorkut, Bill de Blasio i ka përshkruar masat e reja si “mundësinë e fundit” për të ndaluar valën e dytë. Ato do të hyjnë në fuqi nga 13 nëntori.Nju Jorku ka qenë epiqendër e pandemisë së koronavirus në pranverë me gati 1,000 viktima në ditë, në fillim të muajit prill.Kufizimet e reja atje vijnë teksa shtetet tjera janë duke u bërë thirrje njerëzve që ta trajtojnë me seriozitet përhapjen e koronavirusit, sidomos tani kur po afrohet Festa amerikane e Falënderimeve dhe ajo e Krishtlindjeve.
