Situata mbetet alarmante në Deçan të Kosovës. Numri i pacientëve që dyshohet se janë helmuar nga uji i pijshëm ka shkuar diku te 1500 persona, ka thënë drejtori i Qendrës Kryesore Kryesore të Mjekësisë Familjare në Deçan, Selmon Berisha.
Gjithashtu ai ka thënë se të gjithë personat që janë paraqitur me shenja helmimi kanë marrë trajtimin e nevojshëm në Qendrën Kryesore të Mjekësisë Familjare, bën me dije Klan Kosova.
“Kemi një hendikep këtu në QKMF meqë 11 mjekë kanë shkuar për specializim dhe kjo na ka vështirësuar organizimin e punës. Ndërsa, disa mjekë të rinj kanë shkuar në vende të huaja. Bëj apel te ata që të qëndrojnë në vendin e tyre dhe të japin kontributin e tyre edhe në kushte pak më të këqija”.
Ndërkaq më herët ministri Vitia ka thënë se dy rastet e vdekjes në 24 orët e fundit në Deçan nuk kanë lidhje me rastet e dyshuara për helmim nga uji i pijshëm.
Sjellim në vëmendje se kryetari i komunës së Deçanit ditën e djeshme në një komunikat zyrtare lidhur me situatën tha që rezultatet kimike nuk kanë nxjerr asgjë nga uji i pijshëm, gjithashtu ai hodhi dyshime të forta se mund të jetë e qëllimshme dhe tha se çështja do të hetohet pasi është hera e dytë që përsëritet e njëjta situatë në një periudhe kohore të shkurtër. Gjatë ditës së djeshme në një komunikat zyrtare edhe Presidentja e Kosovës ka kërkuar që të zbardhen të gjitha rrethanat dhe të çohen deri në fund hetimet.
