Rritja e ndjeshme e temperaturave ka sjellë një shtim të menjëhershëm të vatrave të zjarrit në të gjithë vendin, me përhapje të konsiderueshme në disa qarqe.
Gjatë 24 orëve të fundit, janë raportuar 26 vatra zjarri, të cilat sipas Ministrisë së Mbrojtjes dhe Agjencisë Kombëtare të Mbrojtjes Civile, janë neutralizuar pas një angazhimi të vazhdueshëm të forcave operacionale në terren.
Zjarret janë regjistruar në qarqet Vlorë, Gjirokastër, Lezhë, Shkodër, Dibër, Korçë, Tiranë, Kukës, Durrës dhe Berat.
“Kryesisht zjarret kanë rënë në sipërfaqe me bimësi, ku si pasojë janë djegur rreth 56 hektarë sipërfaqe me pemë, shkurre e barishte. Në dy raste zjarret janë evidentuar në një biznes dhe në një banesë, ku janë shkaktuar dëme materiale,” thuhet në njoftimin zyrtar të Ministrisë së Mbrojtjes.
Një nga rastet më problematike u shënua në Durrës, ku një zjarr në tregun industrial sezonal pranë plazhit shkaktoi dëme të mëdha materiale, duke dëmtuar mallra dhe pajisje pavarësisht ndërhyrjes së shpejtë.
Ndërkohë, në bashkinë Kuçovë, dy puse nafte në fshatin Kozare u përfshinë nga flakët pas një defekti elektrik.
“Në vendngjarje shkuan Shërbimi vendor i MZSH të bashkisë Kuçovë me 2 automjet zjarrfikës dhe 8 efektivë, MZSH Berat me 2 automjete zjarrfikëse me 7 efektivë, 4 forca policore dhe 6 forca bashkiake, të cilët punuan për shuarjen e tij. Si pasojë, u dëmtuan 2 elektromotorrë të 2 puseve të naftës. Shkaku i rënies së zjarrit është bërë këputja e telave të tensionit të ulët,” njoftoi Mbrojtja Civile.
Në total, për të përballuar situatën, janë angazhuar 64 automjete zjarrfikëse dhe 449 forca operacionale, përfshirë edhe 14 efektivë dhe 2 automjete zjarrfikëse nga Forcat e Armatosura, si dhe një helikopter tip Cougar.
Ministria paralajmëron se sipas Institutit të Gjeoshkencave, për ditën e sotme pritet nivel rreziku “i lartë” për qarqet Lezhë, Durrës, Tiranë, Berat dhe Fier, ndërsa në qarqet e tjera pritet rrezik “i moderuar”.
“Qendra Kombëtare Operacionale e Emergjencave Civile është në ndjekje të situatës dhe në gatishmëri për të ofruar mbështetje të menjëhershme nëse do të jetë e nevojshme,” thuhet në deklaratë.
