Rritja e rasteve të reja me koronavirus ka ngjallur panik tek qytetarët por jo vetëm pasi dhe autoritetet po ndjehen gjithmonë e më shumë të rrezikuar nga përhapja e varianteve të reja. Masat kufizuese po rivendosen në fuqi pothuajse në çdo shtet, në mënyrë që të parandalohet përhapja e varianteve të reja me Covid-19. Me një vendim të ri ka ardhur dhe qeveria japoneze e cila ka vendosur të zgjasë periudhën e gjendjes së jashtëzakonshme për shkak të vazhdimit të rritjes së rasteve të koronavirusit (COVID-19).
Sipas agjencisë së lajmeve Kyodo, e cila ka cituar burime qeveritare, kohëzgjatja e gjendjes së jashtëzakonshme, e cila është planifikuar të përfundojë më 12 shtator, do të zgjatet për tri javë.
Kryeministri Suga Yoshihide gjatë javës do të takohet me ministrin e Shëndetësisë Tamura Norihisa dhe anëtarin e kabinetit qeveritar përgjegjës për masat anti-COVID-19, Nishimura Yasutoshi.
Kryeministri Suga do të shpallë vendimin përfundimtar për zgjatjen e gjendjes së jashtëzakonshme pas këshillave të Bordit Këshillimor Përgjegjës për Masat Kundër Koronavirusit.
Aktualisht, gjendja e jashtëzakonshme zbatohet në 21 shtete në gjithë vendin, përfshirë zonat metropolitane të Tokios dhe Osakës.
Mediat lokale theksojnë se Lojërat Olimpike të Tokios që u mbajtën nga 23 korriku deri më 8 gusht dhe Lojërat Paralimpike më 24 gusht – 5 shtator, rritën numrin e rasteve të të infektuarve në kryeqytetin Tokio.
Numri i rasteve me COVID-19 në Japoni është rritur në mbi 1,58 milionë, kurse ai i vdekjeve vdekjeve në 16.412.
