Në Greqi numri i të infektuarve me Covid-19 po rritet çdo ditë e më shumë, dhe disa qytete kanë rikthyer masat kufizuese për të parandaluar përhapjen e mëtejshme të infeksionit.
Një ndër qytetet më të prekura nga koronavirusi është Selaniku pasi një në tre persona që bën një test, del pozitiv.
Sipas medieve, e gjithë Greqia veriore vazhdon të jetë nën pushtetin e virusit mbytës, me Selanikun në qendër të epidemisë, për shkak të popullsisë dhe për shkak të strukturave shëndetësore, në të cilat trajtohen edhe pacientë nga zona të tjera. Nga 2,384 raste të njoftuara dje nga Organizata Kombëtare e Shëndetit Publik (EODY), 652 prej tyre ndodhen në Selanik dhe 588 në Atikë.
Ndërkohë ekspertët theksojnë se duke parë rritjen e numrit të rasteve të reja me Covid në Selanik, është e rëndësishme që të rikthehen masat kufizuese.
Ministri i Shëndetësisë Vassilis Kikilias, ka qenë këtë të mërkurë në qytet ku ka parë nga afër situatën. Gjithashtu në kuadër të mbrojtjes së përhapjes së koronavirusit pritet që të vendoset dhe mbyllja e shkollave fillore në këtë qytet.
Ndërkohë në mbledhjen e përjavshme pritet që ekspertët të bëjnë dhe komunikimin përkatës në lidhje me masat e reja.
