Shtëpitë konsiderohen për njerëzit një strehë e rehatshme dhe mbahen si vendi më i sigurt, por edhe kjo gjë është relative.
Pikërisht nëpër shtëpi ndodhin një pjesë e madhe e aksidenteve dhe incidenteve, që në shumë raste janë edhe fatale për jetën dhe shëndetin e banorëve të tyre.
Hulumtimet e një ankete kanë treguar se gjithnjë e më shpesh shumica e amvisërive nuk i ndjekin rekomandimet mbi masat e sigurimit dhe parandalimit të goditjeve elektrike, apo rrezikut nga zjarri.
Këto probleme më shpesh ndodhin për shkak të instalimeve të këqija elektrike dhe mungesës së kujdesit për to.
Megjithatë, janë të rralla situatat kur problemi ndodh befas, pasi zakonisht, më parë ndodhin disa sinjale paralajmëruese që nuk duhen neglizhuar.
- Kur llambat e dritave bëjnë shkëndija
Shkëndijat apo xixat e llambave mund të jetë shenjë e lidhjeve të këqija elektrike. Verifikoni në sa llamba keni të njëjtin problem.
Nëse është fjala vetëm për një prej tyre, problemi me siguri është teli i kontaktit të poçit, mirëpo nëse ka më shumë, mund të jetë problem në qarkun elektrik.
Në këtë raste duhet verifikuar kutia e siguresave (automateve) ose duhet të thërrisni elektricistin i cili duhet ta zgjidhë problemin.
- Kur prizat janë të nxehta kur i prekni
Është normale që disa aparate nxehen kur përdoren apo kur janë të takuara në rrymën elektrike, mirëpo nuk është normale që priza dhe korniza e saj në mur të jenë të nxehta kur i prekni.
- Kur prizat nuk janë fiksuar mirë në mure
Priza jo e përforcuar mirë është shumë e rrezikshme. Sa më shumë që të varet në mur, duke dalë jashtë tij një pjesë, mundësia është më e madhe që telat të dalin jashtë dhe të shkaktojnë shkëndija, kontakte të shkurtra, madje edhe zjarr.
- Telat e aluminit
Alumini në të kaluarën është përdorur shumë në punimin e instalimeve elektrike, ndërkohë pikërisht ai është fajtori i shumë zjarreve.
Shkaktar i kësaj është se oksidimi i aluminit mund të shkaktojë nxehje të madhe në tela të lidhur me prizat dhe me dritat.
- Aroma e djegies
Kjo aromë kurrë nuk është e mirë. Ajo është shenjë se telat janë nxehur aq shumë sa që mbrojtësja plastike e veshjes së tyre ka filluar të shkrihet. Rreziku nga fatkeqësia dhe zjarri atëherë është shumë i lartë.
/GazetaReforma.com/
