Në mëngjesin e sotëm në emisionin “Koha për t’u zgjuar” në News24, eksperti i pensioneve Kujtim Hoxha foli për ndryshimet ligjore të paralajmëruara në fushën e sigurimeve shoqërore dhe pensioneve.
Hoxha, i cili ka regjistruar një organizatë për pensionistët të quajtur “Thinjat”, theksoi se qëllimi i këtyre ndryshimeve është të mbushet hendeku mes skemës së sigurimeve shoqërore dhe shpenzimeve për pagimin e pensioneve.
Ai gjithashtu theksoi ndryshimin e propozuar për gratë, ku pensioni do të shtyhet çdo vit me katër muaj, në vend të dy muajve siç është aktualisht, duke prekur interesat e qytetarëve.
“Ndryshimet për Sigurimet Shoqërore, do të bëhen me mendimin që të përmirësohet në funksion të mbylljes së gropës mes të ardhurave dhe shpenzimeve.
Duhet pasur parasysh që ndryshimet e ligjit janë vetëm për këtë apo ka edhe interesa të tjera të qytetarëve. Për mendimin tim ka një përkeqësim të interesave të qytetarëve.Bëhet fjalë për ndryshime në vjetërsinë e punës, shtimi i moshës, për gratë ishte parashikuar të shtoheshin 2 muaj në vit, tani do të shtohet me katër muaj. Duke mos paguar ka diferencë më të vogël mes të ardhurave dhe shpenzimeve”, tha ai.
