Detaje të reja janë zbardhur ne lidhje me vrasjen e dy vëllezërve Andrea dhe Martin Olldashi në Maliq të Korçës.
Mësohet se përpara se të humbnin kontaktet me familjen, dy vëllezërit kanë biseduar me 11 persona.
Gjithashtu mësohet nga ekspertiza mjekoligjore se ata janë qëlluar me pistoletë nga një distancë e afërt.
Martini është qëlluar pas koke pranë veshit të majtë ndërsa Andrea me një plumb në zemër.
Ndërkohë është marrë në pyetje dhe K.Hoxha, e dashura e njërit prej djemve.
Trupat e pajetë të dy vëllezërve Olldashi nga Pogradeci, u gjetën më 10 dhjetor të këtij viti në një kanal kullues, pranë një are në Maliq të Korçës, tre ditë pas largimit të tyre nga banesa.
Andrea dhe Martin Olldashi, 31 dhe 33-vjeç rezultonin me precedentë të mëparshëm penalë për vjedhje të banesave, gjobëvënie ndaj bizneseve si dhe trafik të narkotikëve. Një tjetër ngjarje e rëndë për të cilën ata ishin arrestuar më parë, është vendosja e tritolit në një lokal në vitin 2012.
Nuk përjashtohet mundësia që vëllezërit të jenë marrë peng në datën 7 dhjetor, kur edhe u denoncuan të humbur nga nëna e tyre, si dhe të jenë ekzekutuar po atë ditë në zonën e Maliqit. Trupat e pajetë u gjetën nga një banor i zonës, i cili vuri re dorën e një prej viktimave, pasi ishin mbuluar me dhe.
Të dy viktimat rezulton të mos jenë grabitur, pasi sendet personale, orë, telefon, një paketë cigareje dhe sasinë e parave prej 6250 lekë të vjetra e kishin me vete. Në xhupin e Andrea Olldashit, u gjendën një palë doreza sintetike me ngjyrë të zezë, sende të cilat janë çuar të gjitha për ekzaminim. Ndërkohë të dy trupat e pajetë janë qëlluar me pistoletë nga një distancë e afërt, konkretisht Martin Olldashi është qëlluar nga pas koke, pranë veshit të majtë, duke i shkaktuar vdekjen e menjëhershme.
Në vendin e ngjarjes janë gjetur 4 gëzhoja dhe hetuesit thonë se e gjitha ngjarja ka ndodhur në 2 sekonda.
Vëllai tjetër, Andrea është qëlluar një herë të vetme me armë zjarri në zemër. Ngjarja e rëndë u raportuar me 8 dhjetor të këtij viti.
Të dy vëllezërit ishin me precedentë penalë dhe Policia e Korçës, ka ngritur dyshime të forta se 2 të rinjtë janë vrarë për shkak të aktivitetit të paligjshëm që ata ushtronin.
Madje, sipas dëshmive, dy vëllezërit janë tërhequr drejt skenës së krimit ku do të ekzekutoheshin, me mirëbesim dhe më pas janë qëlluar për vdekje. Për momentin nuk ka asnjë person të arrestuar dhe dyshuar për këtë ngjarje të rëndë./Gazetareforma.com/
