Kodra e Krastës në Elbasan ka qenë e mbipopulluar nga policë të shumtë dhe agjentë kriminalë, të cilët po kërkojnë për të gjetur prova të atentatorëve të Ardian Çapjajt.
Qitësi dyshohet se ishte vendosur në fund të kodrës së Krastë, që ndodhet përballë vilave të familjes Çapja, rreth 280 metër largësi dhe duke përdorur edhe silenciator dhe gëzhojën nuk e ka lënë në vendin e ngjarjes.
Bazuar në këto të dhëna, hetuesit thonë se bëhet fjalë për një vrasës profesionist.
Sipas Gazeta Shqip, teksa u qëllua me snajper, në rrugën e Çapjave ndodheshin dy persona, të cilët janë parë nga dy dëshmitarë.
Pasi objektivi u qëllua, dy personat që rrinin pranë vilave të Çapjave kanë shkuar drejt makinës Volksvagen, e cila qëndronte pranë rrugës kryesore Elbasan-Librazhd.
Snajperisti dhe dy vëzhguesit kanë vrapuar menjëherë drejt saj sapo objektivi është qëlluar, duke besuar se e kanë lënë të vdekur dhe kanë ndjekur rrugën kryesore Elbasan-Librazhd, e në rreth-rrotullimin e Zaranikës janë nisur për në Fushë-Mbret, ku edhe kanë djegur makinën.
Në zonë i prisnin bashkëpunëtorët e tjerë me një makinë fuoristradë.
Në mjetin e djegur lanë snajperin dhe disa municione, shpërthimi i të cilave plagosi edhe një zjarrfikës.
Nga ana tjetër, Ardian Çapja vijon të qëndrojnë në Spitalin e Traumës, ende në rrezik për jetën, por mbrëmjen e të hënës ka dhënë dëshminë e parë për Policinë, duke mohuar atentatin, pasi shprehet se është rrëzuar mbi një hekur që i ka shpuar tejpërtej.
“Nuk guxon njeri të më vrasë në shtëpinë time. Pasi u rrëzova nga banesa në shpatull më ka hyrë një hekur, prandaj ngeli edhe plaga. Ju po mashtroni”, u është drejtuar Ardian Çapja oficerëve që e pyetën për ngjarjen.
Mirëpo, ekzaminimet flasin për një plumb që i ka kaluar fare pranë zemrës dhe në shtëpinë e Capjas nuk kanë gjetur hekurin që ai pretendon se e ka shpuar.
Mëngjesin e djeshëm Elbasani do zgjohej me një ngjarje të rëndë, pasi Ardian Çapja, koka e familjes Çapja dhe pronari i një sërë bizneseve ka rënë pre për herë të tretë e një atentati.
Ai është qëlluar me snajper, por arriti të mbijetonte, duke u plagosur në shpatullë dhe këmbë, teksa menjëherë u transportua drejt Spitalit të Traumës në kryeqytet.
Mësohet se një person i veshur si punonjës në fushën e ndërtimit, me kominoshe që përdorin punonjësit e llaçit, ka zbritur nga një automjet i llojit “Range Rover”, i Policisë dhe ka vrapuar drejt banesës së Çapjave, ku ka qëndruar për më shumë se një orë.
Ky person, mendohet të jetë kyç në atentatin e ndodhur sot.
Nga ana tjetër, pas atentatit, mësohet se janë angazhuar të gjithë njerëzit e Çapjave dhe janë vënë në ndjekje të autorëve, ndërsa disa prej tyre bllokuan rrugën kryesore në dalje të Krastës dhe pritën momentin kur me ‘shpejtësi skëterrë’ kaloi mjeti i atentatorëve.
I plagosur ka ngelur edhe një zjarrfikës i cili ka tentuar të shuajë flakët tek makina e djegur e autorëve, por aty është përballur me shpërthimin e disa fishekëve.
Edhe pse plumbi i kaloi pak centimatra pranë zemrës dhe një tjetër e mori në këmbë, Çapja ia doli të mbijetojë por është në rrezik për jetën.
