Kur Prokuroria e Posaçme kundër Korrupsionit dhe Krimit të Organizuar kërkon heqjen e imunitetit të një deputeti, Kuvendi ndjek një procedurë të parashikuar qartë nga Rregullorja e Parlamentit.
Procesi nis sapo Kryetari i Kuvendit merr shkresën zyrtare nga SPAK. Kërkesa, së bashku me dokumentacionin shoqërues, i përcillet menjëherë për shqyrtim Këshillit për Rregulloren, Mandatet dhe Imunitetin, ndërsa deputeti për të cilin kërkohet autorizimi vihet zyrtarisht në dijeni.
Ky Këshill përbëhet nga 9 deputetë, ku 5 përfaqësojnë mazhorancën dhe 4 opozitën. Anëtarët janë Bledar Çuçi, Bledi Çomo, Elda Hoti, Niko Peleshi dhe Taulant Balla nga mazhoranca, si dhe Gazment Bardhi, Gent Strazimiri, Oerd Bylykbashi dhe Saimir Korreshi nga opozita.
Deputeti ndaj të cilit është paraqitur kërkesa njoftohet për përmbajtjen e saj, për dokumentet shoqëruese dhe për datën e nisjes së shqyrtimit në Këshill. Ai ka të drejtë të paraqesë shpjegime me shkrim ose gojarisht, të përfaqësohet nga mbrojtës ligjor, të drejtojë pyetje dhe të kërkojë sqarime, në kuadër të ushtrimit të së drejtës së mbrojtjes.
Pas përfundimit të shqyrtimit, brenda dy javësh, Këshilli harton një raport që i paraqitet seancës plenare. Në këtë raport rekomandohet miratimi ose rrëzimi i kërkesës për dhënien e autorizimit për masa sigurie, si arrest në burg, arrest në shtëpi, heqje lirie në çdo formë, si edhe kontroll personal ose të banesës. Raporti u shpërndahet të gjithë deputetëve.
Kërkesa përfshihet si pikë e parë e rendit të ditës në seancën plenare pasardhëse. Në fillim të seancës, fjala i jepet deputetit ndaj të cilit është paraqitur kërkesa, për të dhënë shpjegime ose për t’iu përgjigjur pyetjeve të deputetëve. Raporti i Këshillit nuk i nënshtrohet diskutimit.
Vendimi përfundimtar merret nga Kuvendi përmes votimit të hapur, duke dhënë ose jo autorizimin e kërkuar nga organet e drejtësisë. Në rast se Kuvendi nuk merr një vendim brenda tre muajve nga paraqitja e kërkesës, ajo konsiderohet automatikisht e rrëzuar.
