Me ardhjen e pranverës do të kemi dhe lajme të mira. Epidemiologu Klinik, Ilir Alimehmeti, ka thënë mëngjesin e sotëm se në pranverë pritet një ulje e rasteve me Covid-19.
“Nuk do zhduken rastet me Covid, por do ketë ulje. Në 10 ditët e kaluar testimet kanë qenë poshtë 20%. Testimet ishin 29% më 1 shkurt, ndërsa tani jemi në shifrat 14%. Po ta shohim shifrën e djeshme janë 394 qytetarë të shtruar, pra që janë zyrtare. Kemi ulje dhe të shtrimeve në spital”, theksoi Alimehmeti.
Në një njoftim të fundit, Komiteti Teknik njoftoi se pas datës 25 Mars do të lejohen tubimet. Ky vendim erdhi një muaj para zgjedhjeve, ndoshta me qëllimin për mos të ulur popullaritetin e tyre.
Gjithashtu, nëse iu referohemi numrit të raportuar së fundmi të personave të infektuar dhe atyre që kanë ndërruar jetë, është vënë re një ulje e numrit të rasteve.
Në 24 orët e fundit numri i viktimave është rritur nga 8 që ishin ditën e djeshme në 11 sot. Aktualisht në spitalet COVID në Tiranë dhe tre spitalet rajonale po trajtohen 394 pacientë, 24 në terapi intensive, nga të cilët 5 pacientë janë të intubuar.
Krahasuar me shifrat e fillimit të marsit, që në vetëm një javë ndërruan jetë 141 persona, apo muajit shkurt që ndërruan jetë rreth 300 persona, në dy javët e fundit është vënë re një rënie e theksuar e rasteve.
