Burime policore nga Greqia kanë siguruar një foto të Jani Aliaj, një prej personave më të kërkuar nga drejtësia. Aliaj u arrestua mëngjesin e 31 dhjetorit në Athinë pas një operacioni të koordinuar ndërkombëtar, ku u angazhuan Interpol Tirana dhe Drejtoria për Marrëdhëniet me Jashtë në Policinë e Shtetit, duke bashkëpunuar ngushtë me policinë greke për ta ekstraduar në Shqipëri.
Jani Aliaj ishte dënuar me burgim të përjetshëm nga drejtësia shqiptare për vrasjen e Elton Çiços në Tiranë, një ngjarje e ndodhur më 1 maj 2016. Gjatë kontrollit të të dhënave të tij, është zbuluar se ai mbante një kartë identiteti të falsifikuar greke me emrin Aleksan Kreshnik dhe për këtë arsye është shoqëruar në stacionin e policisë së Moskatos për hetime të mëtejshme.
Një verifikim më i detajuar ka treguar se Aliaj ishte arratisur nga burgu i Korfuzit më 1 qershor 2015, pas shkeljes së lejes 11-ditore, dhe gjatë kohës që vuante dënimin për vrasje, plagosje dhe armëmbajtje pa leje për ngjarje të ndodhura në vitin 2006 në Athinë. Ai gjithashtu kërkohej ndërkombëtarisht për dy vrasje të tjera të ndodhura në Shqipëri në tetor 2015 dhe maj 2016.
