PD kërkoi sot mocion me debat për gjetjen e OLAF-it, për fondet e BE në Shqipëri, por kjo kërkesë u rrëzua në Konferencën e Kryetarëve. Një përpjekje për të lënë pas kallëzimin e bërë në SPAK nga Zyra Evropiane kundër Mashtrimit Ekonomik dhe EUROJUST ndaj ish-Drejtores së AZHBR, Frida Krifca për abuzimet me fondet e BE.
As kërkesat për sqarim ndaj drejtuesit të SPAK nuk kanë funksionuar, për sa kohë në mes është Qeveria, e vetë kreu i saj i cili e emëroi Krifcën këshilltare në kryeministri për fondet bujqësore të buxhetit të shtetit dhe fondet e huaja për fermerë.
Kujtojmë se ekspertët e OLAF kanë ardhur në Shqipëri për të bërë hetimin teknik-kontabël të fondeve të tyre në AZHBR. Thuhet se skema e abuzimit 132 milionë Euro me fondet e BE, është nxitur e miratuar nga ish-drejtoresha e AZHBR, Frida Krifca.
Raporti i tyre ka përfunduar në SPAK, madje thuhet se përveç prokurorëve specialë, Zyra Evropiane kundër mashtrimit Ekonomik e ka çuar raportin e përgatitur në duart e institucioneve më të lartë të BE-së.
Kujtojmë se hetimet trevjeçare të OLAF nxitën Komisionin Evropian që të pezullonte në mesin e korrikut programin më të rëndësishëm të ndihmës për bujqësinë në Shqipëri, për shkak të dyshimeve për korrupsion. Frida Krifca, ishte e para ministre e Bujqësisë, nën drejtimin e së cilës Bashkimi Evropian bllokon fondet për bujqësinë shqiptare.
Nën drejtimin e saj tek AZHBR janë pranuar ryshfet në forma të ndryshme dhe të njëjtin e kanë ndarë me njëri-tjetrin me qëllim që në mënyrë të kundërligjshme të përfitonin pasuri.
Përveç kësaj paratë e ardhura nga Bashkimi Evropian nuk kanë shkuar për fermerët, por për qoka ndaj pushtetarëve dhe biznesmenë të fuqishëm. Mirë kjo, po investimet ata nuk i kanë bërë në bujqësi sipas programit, por i kanë investuar për vilat e tyre personale në bregdet.
E çfarë po ndodh? Ish-ministrja e Akademisë së Barinjve vazhdon gjithë krenari si këshilltare në kryeministri, derisa t’i vijë radha pas “shokut” të saj Ilir Beqajt i cili gjithashtu vodhi fondet e BE.
