Mazhoranca e ka planifikuar shqyrtimin me urgjencë të dekretit të Presidentit për Kodin Zgjedhor qysh para se Meta të firmoste kthimin në Kuvend. Në mbledhjen e Byrosë Parlamentare, ku është diskutuar plani i punës për këtë javë, Gramoz Ruçi është shprehur se dekreti i Presidentit do të futet në rend të ditës menjëherë, madje duke shtyrë edhe Projekt buxhetin.
“Duke qenë se erdhi projektbuxheti, do të kërkoj që e gjithë agjenda e datës 5 të zhvendoset për datën 29, por jo vetëm kjo, po edhe për këtë që ramë dakord, për këtë datë të bëjmë gati edhe këtë marrëveshje, por jo vetëm për këtë, por mesa duket, po vete drejt kufirit infinit, mosdekretimi nga ana e Presidentit të Republikës i ndryshimeve të Kodit Zgjedhor, për të cilat afati i fundit është në datën 25.
Unë do të shpresoj dhe do të uroj shumë që, Presidenti ta dekretonte apo ta linte në heshtje, me qëllim që të fillojë të funksionojë, për arsye se koha po rrjedh, 25 prilli është shumë afër.
Ne, në qoftë se do ta lëmë në kushte normale që të rrjedhë, në rast kthimi nga Presidenti të këtij projektligji, i bie që të ulemi për të diskutuar për të dhënë datën 5, domethënë të vonohemi edhe një 10-ditësh tjetër.
Kështu që, për t’i paraprirë edhe kësaj, do të kërkoj mirëkuptimin tuaj, që të zhvillojmë seancë në datën 29 me agjendën e seancës së datës 5, pra ta zhvendosim aty, ku të përfshihet edhe ratifikimi i kësaj marrëveshje dhe nëse nga Presidenti do të kthehet, që është kufiri i 25-ës, komisioni përkatës ta shqyrtojë, dhe në datën 29 Kuvendi të shqyrtojë edhe dekretin e Presidentit, në qoftë se do të kthehet në kohë. Hipotetike është, s’kam pse e paragjykoj”, deklaroi Ruçi, i cituar sipas procesverbalit zyrtar të mbledhjes.
/GazetaReforma.com/
