Këtë muaj Kombëtarja jonë do të zhvillojë ndeshjet e radhës për kualifikueset e Ligës së Kombeve dhe një miqësore me Kosovën që do të luhet të mërkurën në orën 16:00 në “Elbasan Arena”.
Por edhe pse jemi përballë ndeshjeve të rëndësishme Kombëtarja jonë do të zbresë në fushë me shumë mungesa pasi disa prej lojtarëve nuk janë lejuar të udhetojnë për shkak të masave kufizuese që ekipet e tyre kanë marrë për të ndaluar përhapjen e Covid-19, por edhe për shkak të dëmtimeve fizike që lojtarët kanë pësuar.
Pas shumë përpjekjeve dhe dëshirës së madhe për ta patur në Kombëtare mbrojtësin shqiptar Marash Kumbulla, shpresat e Rejës janë shuar përfundimisht këtë pasdite.
Shqiptari që luan me Romën në Itali ka njoftuar se ka rezultuar pozitiv me koronavirus dhe nuk do të jetë i gatshëm për të qenë i pranishëm në dy ndeshjet më të rëndësishme të Kombëtares tonë, me Kazakistanin dhe Bjellorusinë për kualifikuese e Ligës së Kombeve.
Në një postim në Instagram, Kumbulla ka shkruar se ka rezultuar pozitiv në testin e kryer së fundmi dhe fatmirësisht nuk ka asnjë simptomë. Por Kumbulla nuk ka harruar që t’iu kujtojë njerëzve që të sensibilizohen dhe të ruhen nga ky virus.
Postimi i Kumbullës:
Përshëndetje të gjithëve! Nga tamponi i fundit që bëra, kam rezultuar pozitiv ndaj Koronavirusit, por për fat jam mirë dhe nuk kam asnjë simptomë. Askush nuk mund të thotë se është plotësisht i sigurt nga ky virus, prandaj do doja të sensibilizoja për të gjithë, që të mbroheni dhe të mos rrezikoni shëndetin tuaj dhe të të tjerëve. Përshëndetje të gjithë tifozëve dhe të gjithë ata persona që po kalojnë një moment të vështirë. Do të shihemi së shpejti!
