Seanca gjyqësore për çështjen “Metamorfoza” u shty sërish, këtë herë për shkak të mungesës së mbrojtjes për të pandehurin Edmond Preka.
Avokatja e tij ka dhënë dorëheqjen nga përfaqësimi, duke detyruar Gjykatën të caktojë një datë të re.
Dosja, e cila përfshin disa emra të njohur të botës së krimit dhe institucioneve të drejtësisë, u çua për gjykim një vit më parë nga Prokuroria e Posaçme.
Në bankën e të akuzuarve ndodhen biznesmeni Pëllumb Gjoka, Behar Brajoviq (i njohur si Bajri), Edmond Preka, Astmer Bilali, Ardrit Hasanbegaj, ish-zyrtari i policisë Oltion Bistri dhe ish-prokurori Xhevahir Lita. Ndërkohë, nëntë persona të tjerë janë ende në kërkim.
Të pandehurit përballen me një sërë akuzash të rënda, përfshirë një vrasje, pesë tentativa për vrasje, pjesëmarrje në grup të strukturuar kriminal, si dhe korrupsion.
Për këtë të fundit, akuzohen veçanërisht ish-kryeprokurori i Kukësit, Xhevahir Lita, dhe ish-zyrtari i policisë, Oltion Bistri, të cilët dyshohet se kanë bashkëpunuar me grupin kriminal kundrejt përfitimeve monetare.
Hetimet për këtë dosje nisën në vitin 2019, pas informacioneve të siguruara nga autoritetet ligjzbatuese të Holandës, Belgjikës dhe Francës, që deshifruan komunikimet e të dyshuarve në platformat e koduara EnchroChat dhe Sky ECC.
Gjykata e Posaçme ka caktuar datën 16 qershor, ora 15:00, për zhvillimin e seancës së radhës.
