Konferenca e Kryetarëve ka marrë vendimin për të shtyrë kërkesën e deputetëve demokratë për ngritjen e komisioneve hetimore parlamentare në lidhje me disa çështje. Disa prej çështjeve kanë të bëjnë me inceneratorët, 25 prillin dhe çështjen e Francesco Becchetti-t.
Gjatë mbledhjes, kreu i Grupit Parlamentar të Partisë Socialiste, Taulant Balla ka thënë se duhet gjetur një konsensus ndërmjet palëve për objektin e hetimit, deri sa të arrihet në marrjen e një vendimi.
“Kuvendi, në rastet kur kërkohet ngritja e komisionit hetimor nga një e katërta e deputetëve, ka detyrimin që të mos e diskutojë ngritjen e komisionit, por ia nënshtron diskutimit parlamentar shkallën e respektimit të parimeve kushtetuese në objektin e veprimtarisë së tij. Ky debat realizohet me qëllim gjetjen e një konsensusi ndërmjet palëve lidhur me objektin e hetimit, deri në arritjen e një vendimmarrje”, ka thënë Balla.
Kujtojmë që Partia Demokratike ka kërkuar ngritjen e një komisioni hetimor për çështjen Becchetti dhe çështjet e tjera të sipërpërmendura. Kujtojmë që biznesmeni italian fitoi gjyqin në arbitrazh ndaj Shqipërisë, dhe tashmë vendi ynë është i detyruar t’i paguajë mbi 110 milionë euro. Gjoba ka filluar të ekzekutohet nëpërmjet llogarive të Albcontrol në Eurocontrol . së bashku me interesat, gjoba ka shkuar 120 milionë euro.
