Pas mbledhjes së Këshillit të Mandateve për rastin e Arben Ahmetajt këtë të mërkurë, deputeti i Partisë Demokratike, Ervin Salianji është shprehur për mediat se ky rast tregon një korrupsion masiv ku është e përfshirë gjithë qeveria. Sipas deputetit demokrat në emrat që përfliten si të përfshirë janë të disa funksionarëve të lart të qeverisë, ndër to dhe Damian Gjiknuri.
Salianji ka shtuar se sa i takon shqyrtimit të kërkesës, Partia Socialiste ka votuar që kjo të ndodhë ditën e hënë, ndërsa përfaqësuesit e opozitës shpresojnë për ditën e nesërme.
“Personi në hetim nuk është në Shqipëri. Ky rast është një rast që ka shpërfaqur në syrin tonë dhe të publikut një rast të madh korrupsioni ku thuajse gjithë qeveria është përfshirë dhe dhjetëra persona deputetë aktualë të PS, kryetarë bashkie e funksionarë të lartë janë përfshirë po njësoj në korrupsion ,Për këtë arsye Rama dhe kjo mazhorancë duhet të japin dorëheqjen për të shmangur këtë krizë që është krijuar. Është përmendur edhe emri që thoni ju, ashtu si dhjetëra të tjerë që janë edhe kryebashkiakë dhe funksionarë të lartë”, u shpreh ai.
Kujtojmë se avokatët e Ahmetajt kanë bërë me dije se ai nuk ndodhet në SHqipëri, por pa përmendur ku është.
