Vlefshmëria e pasaportave diplomatike dhe të shërbimit është shtyrë.
Këshilli i Ministrave, me vendimin e marrë së fundmi, ka rrëzuar vendimin e marrë më 12 qershor kur u vendos se “formati ekzistues i pasaportës diplomatike dhe shërbimit është i vlefshëm deri në datën 31 dhjetor 2020”.
Mirëpo, bazuar në vendimin e ri ky afat është shtyrë deri më 31 dhjetor të 2021.
Po ashtu, është ndryshuar edhe pika 14, që ishte më e kundërshtuara, ku parashikohej se: “Subjektet, që janë pajisur me pasaporta diplomatike apo shërbimi përpara hyrjes në fuqi të këtij vendimi, kanë të drejtë të përdorin pasaportat përkatëse deri në datën 31 dhjetor 2019.”
Tashmë, sipas vendimit të ri : “Subjektet, që janë pajisur me pasaporta diplomatike apo shërbimi përpara hyrjes në fuqi të këtij vendimi, kanë të drejtë të përdorin pasaportat përkatëse deri në datën 31 qershor 2020.”
Shoqata Kombëtare e Gjyqtarëve kundërshtoi gjyqësisht VKM-në e datës 12 qershor 2019, pasi sipa tyre ky vendim cënon statusin e gjyqtarëve.
Mirëpo,Gjykata Administrative e rrëzoi ankimimin e gjyqtarëve.
Gjyqtarët janë vetëm një prej kategorive që pajisen me pasaporta diplomatike dhe shërbimi, ashtu si pjesa më e madhe e funksionarëve publikë.
