Mëngjesin e sotëm një ngjarje kriminale është parandaluar në Vlorë nga forcat e policisë. Bëhet e ditur se një 28-vjeçar i identifikuar si Donald Petani është arrestuar në flagrancë teksa mbante me vete një kallashnikov. Nga hetimet paraprake mësohet se i riu ishte përgatitur për të kryer një krim të rëndë. Po ashtu janë proceduar penalisht dhe 2 persona të mitur, të cilët akuzohen për moskallëzim krimi.
Njoftimi i Policisë:
Parandalohet një ngjarje e rëndë kriminale në Vlorë. Sekuestrohet një armë zjarri kallashnikov. Arrestohet në flagrancë 28-vjeçari që e mbante armën në automjet ndërkohë që qarkullonte në qytetin e Vlorës. Procedohen penalisht 2 shtetas (pasagjerë në automjet), për moskallëzim krimi. Strukturat hetimore të Komisariatit të Policisë Vlorë, në bashkëpunim me shërbimet e Forcës së Posaçme “Shqiponja”, në bazë të informacioneve të siguruara nga inteligjenca policore se një 28-vjeçar po qarkullonte në qytetin e Vlorës, me një automjet në të cilin mbante armë zjarri dhe se do kryente një krim të rëndë, kanë organizuar dhe finalizuar operacionin policor të koduar “Aleksandria”. Në kuadër të këtij operacioni u bë kapja dhe arrestimi në flagrancë i shtetasit: – D. P.(A.), 28 vjeç, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Gjatë kontrollit të ushtruar në automjetin e tij, shërbimet e Policisë gjetën dhe sekuestruan në cilësinë e provës materiale 1 armë zjarri kallashnikov. Për shkak të sekretit hetimor, duke qenë se ngjarja është në hetim, nuk jepen detaje të tjera në lidhje me motivet dhe objektivin e synuar nga i arrestuari. Gjithashtu, në vijim të veprimeve, nisi procedimi në gjendje të lirë për shtetasit F. F., 17 vjeç dhe A. H., 17 vjeç, të dy banues në Vlorë, pasagjerët që udhëtonin së bashku me 28-vjeçarin, në automjetin e tij, për veprën penale “Moskallëzimi i krimit”. Materialet i kaluan Prokurorisë pranë Gjykatës së Rrethit Gjyqësor Vlorë, për veprime të mëtejshme procedurale.
