Rreth 7% e popullsisë globale vuan nga Hashimoto, një sëmundje autoimune që prek tiroiden.
Europa renditet e dyta pas Afrikës për numrin më të lartë të rasteve.
Në Shqipëri nuk ka statistika të sakta mbi përhapjen e kësaj sëmundjeje, por mjekët raportojnë një rritje të ndjeshme të rasteve pas pandemisë së COVID-19.
Endokrinologu Florian Toti shpjegon se gratë preken më shpesh nga sëmundjet e tiroides krahasuar me burrat.
Hashimoto ka një bazë gjenetike, prandaj personat me histori familjare të kësaj sëmundjeje këshillohen të kryejnë kontrolle të rregullta për diagnostikim të hershëm.
Sipas mjekut, pacientët me Hashimoto mund të kenë një jetë normale, por janë më të rrezikuar nga sëmundje të tjera autoimune.
Kjo patologji ndodh kur sistemi imunitar e sulmon tiroiden, duke e konsideruar atë si një trup të huaj dhe duke prodhuar antitrupa kundër saj.
