Ditën e sotme Ministria e Shëndetësisë raportoi për 78 raste të reja të infektuara me Covid-19, në 24 orët e fundit në vendin tonë.
Por, me shtimin e rasteve Ministria e Shëndetësisë ka zbuluar një tjetër skenar sesi dhe ku do të trajtohen të infektuarit sipas zonave.
Mendohet se spitalet rajonale të rretheve do të kthehen në spitale Covid.
Ky lajm u bë sot me dije nga zyrtarja e ministrisë së Shëndetësisë, Mirela Cami teksa ndodhej në Shkodër.
“Për momentin kujdesi për të infektuarit jepet në spitalin infektiv COVID1, por nëse kemi rritje të numrave mund të shfrytëzohen dhe spitalet rajonale.
Për momentin kemi vetëm spitalin Infektiv. Në varësi të situatës do të merren edhe vendime të tjera.
Numri i tamponëve nuk vjen si mungesë por sipas rekomandimeve të epidemiologeve”, u shpreh Mirela Cami.
Pas këtij njoftimi të dhënë nga Cami, Drejtori i Spitalit të Shkodrës, Ardian Dajti u shpreh i gatshëm për të zbatuar vendimin e qeverisë.
“Lufta nuk ka mbaruar akoma, respektoni masat.
Ne si drejtori nuk kemi ndryshuar asnjë masë, masat janë njësoj si në kohën e mbylljes, vazhdojmë të ndjekim të njëjtat masa.
Sa i takon trajtimit të të prekurve ne kemi kapacitete por kjo varet nga vendimi i qeverisë, nëse qeveria vendos që të prekurit të trajtohen në spitalin rajonal ne do i përgjigjemi”, u shpreh Ardian Dajti.
