Belina Pupa, terapiste dhe influencuese me mbi 80 mijë ndjekës në rrjetet sociale, është përballur këtë të martë me drejtësinë australiane, pasi ndaj saj janë ngritur akuza për kultivim të kanabisit dhe ndërhyrje të paligjshme në rrjetin elektrik.
E njohur edhe si bashkëshortja e aktorit Elvis Pupa, ajo u paraqit përpara Gjykatës së Magjistraturës në Adelaide, por nuk dha asnjë qëndrim mbi fajësinë për akuzat që rëndojnë mbi të.
Sipas materialeve të paraqitura në gjykatë, ngjarja dyshohet të ketë ndodhur gjatë periudhës 1 janar – 4 prill 2025, në një pronë në Ascot Park, ku janë gjetur 43 bimë kanabisi.
Avokati i saj kërkoi lehtësim të kushteve të lirisë me kusht, duke theksuar natyrën ndërkombëtare të angazhimeve profesionale të Pupës.
“Ajo ka klientelë në Shqipëri, SHBA dhe Australi, dhe shpenzon rreth tre muaj në vit në Shqipëri, ku ofron shërbimet e saj edhe në televizion”, argumentoi mbrojtja në sallën e gjyqit.
Prokuroria kundërshtoi kërkesën, duke e konsideruar çështjen të rëndë, dhe theksoi se bashkëshorti i saj, Vis Pupa, i cili është gjithashtu i përfshirë në dosje, ndodhet në arrati.
Gjykata vendosi të shtyjë seancën për javën e ardhshme, ndërsa Belina Pupa do të vazhdojë të jetë në liri me kusht deri në shqyrtimin e radhës.
Pupa njihet gjerësisht në komunitetin shqiptar të diasporës për aktivitetin e saj si promotore e mirëqenies mendore, me prani të rregullt në emisione televizive dhe platforma digjitale ku flet për shëndetin psikologjik.
