Komisioni i Pavarur i Kualifikimit (KPK), ka shkarkuar gjyqtaren e Gjykatës së Apelit në Korçë, Etleva Temon.
Temo nuk justifikonte dot pasurinë e saj dhe për këtë arsye Komisioni e ka shkarkuar.
Komisioni i Vetingut ka zbuluar se punonjës së Gjykatës së Apelit të Korçës i kanë mbushur llogarinë bankare me para gjyqtares, Etleva Temo. Gjatë seancës dëgjimore, gjyqtarja ka deklaruar para trupës gjykuese të Vetingut se paratë ia kanë kaluar në llogari në rrethana shoqërore.
Gjyqtarja nuk ka deklaruar as aksionet e bashkëshortit në Albtelekom si dhe ka shqyrtuar çështje të kompanive, tek të cilat kishte punuar bashkëshorti.
Bashkëshorti i saj gjithashtu bënte udhëtime me personat që gjyqtarja u kishte pasur në dorë çështjet. Sa i takon pasurisë, gjyqtarja rezultoi se nuk justifikonte 52 milionë lekë.
Temo ka qenë pjesë e trupës gjykuese me gjyqtarët Mimoza Margjeka dhe Olsi Xhavella, në ndryshimin e masës së sigurisë së Orion Balit. Çështje për të cilën gjyqtarja Margjeka është dënuar për rryshfet 6 mijë euro, së bashku me bashkëkshortin e saj dhe një sekser.
Po ashtu gjyqtarja Etleve Temo është caktuar më parë nga KLGJ-ja si gjyqtare në procesin “Shullazi”.
Gjyqtarja Temo ka qenë gjithashtu pjesë e trupës së gjyqtarëve që shpallën të pafajshëm 11 anëtarë të organizatës “Hakmarrja për Drejtësi”, me rreth 17 akuza penale, pas një procesi gjyqësor që ka zgjatur rreth 20 vjet./GazetaReforma.com/
