Jo vetëm që emigrojnë, por gjithnjë e më shumë qytetarë shqiptarë po heqin dorë nga shtetësia e vendit të tyre.
Sipas të dhënave të Ministrisë së Brendshme, vitin e kaluar, rreth 900 shtetas shqiptarë vendosën të heqin dorë nga pasaporta shqiptare, duke shënuar një numër rekord.
Krahasuar me vitin 2023, ky numër ka shënuar një rritje prej 6%, duke treguar një tendencë në rritje të braktisjes së shtetësisë shqiptare.
Një faktor kyç që qëndron pas këtij fenomeni është kërkesa e disa shteteve ku shqiptarët emigrojnë, që për marrjen e shtetësisë së atij vendi, individët duhet të heqin dorë nga shtetësinë e mëparshme.
Për të siguruar mundësi më të mira jetese, si akses më të lehtë në të drejta sociale, punësim, apo udhëtime, shumë shqiptarë janë të detyruar të heqin dorë nga pasaporta shqiptare.
Të dhënat e Ministrisë së Brendshme tregojnë se gjatë 10 viteve të fundit, rreth 6,500 qytetarë shqiptarë kanë hequr dorë nga shtetësia shqiptare në mënyrë zyrtare. Profilizimi demografik tregon se shumica e individëve që kanë ndërmarrë këtë hap janë të rinj.
Sipas statistikave nga Instituti i Statistikave, mbi gjysma e atyre që kanë braktisur vendin dhe kanë aplikuar për të jetuar dhe punuar jashtë janë në moshën 15–35 vjeç.
Gjithashtu, sipas EUROSTAT, në 20 vitet e fundit, mbi 521 mijë shqiptarë kanë marrë shtetësinë e një vendi të Bashkimit Europian.
Ky është një tregues i fortë i rritjes së emigracionit dhe integrimit të shqiptarëve në shoqëritë evropiane, shpesh duke sakrifikuar shtetësinë e origjinës për mundësi më të mira jetese dhe integrim më të lehtë./ Scan.TV
