Gjatë një ndeshjeje basketbolli në Kumanovë mes Maqedonisë së Veriut dhe Rumanisë u dëgjuan thirrje të rënda antishqiptare. Në stadium ishin të pranishëm zyrtarë të lartë maqedonas, por edhe kolegë të tyre, politikanë shqiptarë.
Analisti nga Prishtina, Blerim Latifi, vë në pah një shqetësim më të thellë: shkombëtarizimi kulturor dhe dobësimi i pozicionit politik të shqiptarëve në Maqedoninë e Veriut ka arritur në një nivel ku reagimi ndaj këtyre sulmeve ndaj identitetit të tyre kombëtar është pothuajse inekzistent.
Latifi thekson se, ndërkohë që shqiptarët në Maqedoninë e Veriut nuk tregojnë sensibilitet për sulmet e drejtpërdrejta ndaj tyre, ata shpesh shfaqin solidaritet për çështje të tjera, siç është ajo e Palestinës.
“Në një ndeshje basketbolli në Maqedoninë e Veriut janë bërë thirrje për ndërtimin e dhomave të gazit për shqiptarët – madje në prani të vetë kryeministrit maqedonas. Siç dihet, dhomat e gazit janë simbol i shfarosjes së një populli. Nga ajo që shihet, reagimi i shqiptarëve atje është pothuajse inekzistent. Dhe arsyet janë të qarta: defaktorizimi politik dhe shkombëtarizimi kulturor i shqiptarëve në Maqedoninë e Veriut ka arritur në atë pikë, saqë edhe një retorikë kaq brutale dhe antishqiptare si kjo nuk prodhon më as ndjeshmëri, as reagim.
Atje, shqiptarët të mbesin në fyt për Palestinën, por jo për çështje ku cenohet drejtpërdrejt identiteti i tyre kombëtar. Dhe kjo i thotë të gjitha”, shprehet Latifi.
Ai nënvizon se kjo mungesë reagimi flet shumë për gjendjen e shqiptarëve atje dhe për prioritetet e tyre aktuale politike dhe sociale.
Gjithashtu, Federata e Basketbollit e Maqedonisë së Veriut ka reaguar ashpër ndaj thirrjeve nacionaliste dhe gjuhës së urrejtjes të përdorura nga një pjesë e tifozëve.
Në një deklaratë zyrtare, Federata dënon veprimet fyese që u dëgjuan në tribuna, duke theksuar se këto sjellje nuk përfaqësojnë vlerat dhe identitetin e saj. “Sloganet nacionaliste, gjuha e urrejtjes dhe nxitja e intolerancës nuk kanë vend në tribuna.”
Gjatë ndeshjes, një pjesë e tifozëve brohorisnin me tone raciste dhe nacionaliste, duke përdorur fraza të rënda si: “Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër.”
