Shumë emigrantë shqiptarë kanë mbetur të bllokuar në doganën greke e atë malazeze dhe nuk lejohen që të vijnë në Shqipëri.
Ndonëse Edi Rama u shpreh se asnjë emigrantë që kalon afatin 90 ditorë, nuk do penalizohet me gjobë, shumë persona janë nisur dhe kanë mbetur në doganë.
Së fundmi, presidenti Ilir Meta ka reaguar për shqiptarët e bllokuar në kufirin me Greqinë dhe Malin e Zi dhe me anë të një statusi në Facebook shkruan se po ndjek këtë situatë dhe shton se autoritetet shqiptare përgjegjëse të informojnë pa vonesë qytetarët tanë mbi gjendjen dhe procedurat e reja që duhen respektuar në pikat tona kufitare, të imponuara nga pandemia COVID-19.
Më tej, kreu i Shtetit bën thirrje që, duke forcuar bashkëpunimin midis qytetarëve dhe autoriteteve përgjegjëse në këtë situatë të vështirë, të tregojmë mirëkuptim e bashkëpunim dhe të kapërcejnë këtë situatë të vështirë.
Statusi:
“Jam duke ndjekur me vëmendje dhe me shumë shqetësim situatën e qytetarëve shqiptarë të cilët ndodhen të bllokuar në pikat e kalimit kufitar me Greqinë dhe Malin e Zi.
Situata e pritjes së tyre në kufirin shqiptar dhe pengesa që po hasin kërkon një zgjidhje të shpejtë.
Autoritetet shqiptare përgjegjëse të informojnë pa vonesë qytetarët tanë mbi gjendjen dhe procedurat e reja që duhen respektuar në pikat tona kufitare, të imponuara nga pandemia COVID-19, në mënyrë që të mos krijohen grumbullime të pamenaxhueshme.
Në të mirë të të gjithëve, shtetasit tanë duhet të jenë në komunikim të vazhdueshëm me ambasadat dhe konsullatat tona, si dhe të evitojnë maksimalisht lëvizjet jashtë kushteve të urgjencës dhe domosdoshmërisë.
U bëj thirrje të gjithëve që, duke forcuar bashkëpunimin midis qytetarëve dhe autoriteteve përgjegjëse në këtë situatë të vështirë, të tregojmë mirëkuptim e bashkëpunim, por veçanërisht solidaritet dhe përgjegjshmëri të lartë për të kapërcyer me sa më pak kosto këtë sfidë të jashtëzakonshme”, shkruan Meta
