“Shqipërisë i dalim zot, pluralizimit, votës së lirë, demokracisë”, është slogani që do t përdoret në protestën e 11 shkurtit të organizuar nga opozita. Slogani u bë publik nga deputetja e PD, Ina Zhupa.
Protesta më 11 shkurt vjen si pasojë e publikimit të një skandali në SHBA ku një ish agjent i lartë i FBI, Charles McGonigal akuzohet për korrupsion dhe në dosje përmendet disa herë kryeministri Rama. Ky i fundit i ka mohuar akuza dhe në fakt ka refuzuar të përballet drejtpërdrejt me opozitën, nën motivin e një virozë që e ka bërë të ndihet jo mirë.
“Në dritën e fakteve të forta: Duke parë se Edi Rama është gati të rekrutojë agjentë të lartë të partnerit strategjik, SHBA, për të zhdukur opozitën e vendit, pluralizmin; duke qenë se ai përben një turp dhe rrezik për stabilitetin e vendit; duke qenë se ai po e shpopullon Shqipërinë; duke qenë se ai rri në pushtet me zgjedhje të vjedhura, me para të krimit dhe patronazhistë; duke qenë se ai sipas KLSH ka vjedhur në 9 muaj 1.1 mld euro të shqiptarëve. Ju ftojmë të bashkoheni më 11 shkurt ora 12:00, t’i dalim zot Shqipërisë, pluralizimit, votës së lirë dhe demokracisë së vendit tonë”, thuhet ndër të tjera në këtë slogan që do të udhëheqë opozitën në shesh më 11 shkurt.
