Zgjedhjet parlamentare në Shqipëri kanë nisur zyrtarisht sot në orën 07:00, me hapjen e 5,225 qendrave të votimit në të gjithë vendin.
Procesi do të vijojë deri në orën 19:00, pas së cilës do të nisë numërimi i votave.
Në garë për 140 ulëse në Kuvend janë 11 subjekte politike me gjithsej 2,046 kandidatë.
Pjesëmarrja përfshin edhe 114,642 qytetarë që votojnë për herë të parë.
Subjektet politike pjesëmarrëse:
1. Koalicioni Partia Demokratike – Aleanca për Shqipërinë Madhështore
2. Partia Lëvizja Bashkë
3. Lëvizja Atdheu
4. Koalicioni Euroatlantik
5. Partia Socialiste
6. Koalicioni Nisma Shqipëria Bëhet
7. Aleanca Kombëtare Shqiptare
8. Aleanca Demokracia e Re
9. Koalicioni Djathtas për Zhvillim
10. Partia Mundësia
11. Partia Social Demokrate
Probleme dhe vonesa në terren
Procesi nuk ka qenë pa pengesa. Në Lushnjë, një qytetar ngriti shqetësimin për kamera sigurie të ndezura brenda një qendre votimi.
Në Durrës, disa qendra nuk ishin funksionale në orët e para për shkak të mungesës së anëtarëve të komisionit nga Partia Demokratike.
Edhe në Tiranë, në Parkun Olimpik, votimi u vonua për shkak të vendosjes së gabuar të kapakëve të kutive të votimit.
Ndërkohë, në Kukës, në zonat Arrën dhe Topojan, janë raportuar probleme me ngatërrimin e listave të votuesve dhe materialeve zgjedhore.
Votimi nga diaspora
Për herë të parë, edhe diaspora shqiptare ka marrë pjesë në votime përmes një platforme elektronike të regjistrimit, e cila ishte aktive nga 11 janari deri më 11 mars.
• Janë dërguar 245,935 zarfe me fletë votimi.
• 227,097 janë tërhequr nga votuesit.
• 181,609 kanë mbërritur në KQZ.
Kjo përfaqëson një pjesëmarrje prej 74% nga të gjithë votuesit e regjistruar në diasporë.
Votat e emigrantëve do të numërohen në KQZ dhe do të llogariten sikur votuesit të kishin votuar në qarkun e origjinës.
Ndarja e mandateve sipas qarqeve
Sipas sistemit proporcional rajonal dhe listës së miratuar nga KQZ, 140 mandatet ndahen në 12 qarqe si më poshtë:
• Berat – 7 mandate
• Dibër – 5 mandate
• Durrës – 14 mandate
• Elbasan – 14 mandate
• Fier – 16 mandate
• Gjirokastër – 4 mandate
• Korçë – 10 mandate
• Kukës – 3 mandate
• Lezhë – 7 mandate
• Shkodër – 11 mandate
• Tiranë – 37 mandate
• Vlorë – 12 mandate
Procesi zgjedhor pritet të jetë vendimtar për përbërjen e re të Kuvendit, ndërsa vëzhgues të brendshëm dhe ndërkombëtarë do të ndjekin ecurinë e tij në të gjithë territorin.
