Mjeku dhe Eksperti, Erion Dashoka folur në lidhje me situatën e pandemisë në vendin tonë. Dasho thotë se qytetarët hezitojnë të vaksinohen si pasojë e keqmenaxhimit të krizës së pandemisë në vendin tonë nga ana e qeverisë.
“Në Shqipëri qytetarët hezitojnë të vaksinohen, kjo vjen dhe si pasojë e gabimeve të mëdha që bëri qeveria në fillim, kur solli vaksinat e para në vend”, tha mjeku në studion e emisionit të mëngjesit “Ditë e Re” në RTV Ora.
Dasho ka vazhduar më tej duke thënë se përgjegjësitë për keq-menaxhimin e situatës pandemike në Shqipëri duhet të ndiqen penalisht nga organet kompetente.
“Ashtu sikur se Brazili po çon në gjyq presidentin, në Francë kanë paditur Ministren e Shëndetësisë penalisht, unë mendoj se personat përgjegjës për keq-menaxhimin e krizës së Covid në Shqipëri, që rezultoi në mijëra vdekje të parandalueshme, meritojnë plotësisht të shkojnë për ndjekej penale.
Më pas e gjykon gjykata se sa komplekse është përgjegjësia e tyre. Personalisht mendoj se ndjekja penale për drejtuesin e Ministrisë së Shëndetësisë, për anëtarë të caktuar të Komitetit të Ekspertëve , ndoshta dhe për kryeministrin Rama, do të ishte një detyrim minimal për një shtet që i thotë vetes shtet i së drejtës. Kemi pasur 16 mijë vdekje nga Covid, kemi pasur 11mijë vdekje shtesë. Jemi vendi me numrin më të lartë të vdekjeve për banorë në botë dhe kjo situatë nuk duhet të kalojë pa investigim dhe pa u analizuar nga organet e drejtësisë”, u shpreh mjeku.
