Kryeministri Edi Rama nëpërmjet një postimi në rrjetet sociale bën me dije se që nga dita e nesërme në orën 13:00 deri të hënën në orën 05:00, Shqipëria do të futet sërish në karantinë.
Po njësoj si dy të dielat e kaluara, qarkullimi i makinave dhe njerëzve do të ndalohet, si masë parandaluese ndaj përhapjes së COVID-19.
Pikat e shitjes gjithashtu dhe bizneset do të mbyllen dhe në rrugë do të jenë vetëm mjetet e shërbimeve të emergjencës dhe policia.
Aktualisht në vendin tonë, numri i të prekurve nga COVID-19, ka shkuar në 289.
Në mesin e tyre, 16 persona kanë ndërruar jetë, ndërsa 85 janë shëruar.
Në spitalin Infektiv ndodhen 81 persona, 8 prej të cilëve në terapi intensive, ku 4 janë intubuar.
Gjithashtu numri i fëmijëve të prekur ka shkuar në 8 dhe për fat të mirë gjendja e tyre është e stabilizuar.
Qyteti më i prekur nga COVID-19 është Tirana dhe ndjekin më pas Durrësi me 30 dhe Fieri me 23.
Autoritetet vijojnë me thirrjet për respektimin e rregullave të higjienës, distancimit social dhe kufizimin e daljeve nga shtëpitë.
