Shqipëria pritet të përfshihet sërish nga një valë e të nxehtit afrikan, duke nisur nga fundjava, me temperatura që do të arrijnë deri në 40 gradë Celsius në hije.
Sinoptikani Hakil Osmani bëri të ditur se temperaturat do të rriten ndjeshëm ditët në vijim, me kulmin që do të arrihet në fundjavë, veçanërisht në qarqet Elbasan dhe Berat, ku pritet të regjistrohen vlera maksimale deri në 40°C. Rritja e ndjeshme do të përfshijë edhe zona të tjera të vendit.
“Kryeqyteti, Shkodra dhe Gjirokastra do të preken gjithashtu nga temperaturat e larta, që pritet të arrijnë deri në 39 gradë, ndërsa në zonat e ultësirës pritet që vlerat të luhaten nga 36 deri në 38 gradë Celsius”, tha Osmani.
Kjo valë e të nxehtit pritet të zgjasë për rreth një javë, duke u shtrirë deri në mesin e javës së ardhshme. Sipas parashikimeve, temperaturat ekstreme do të vijojnë të mbeten në nivele të larta edhe pas javës që vjen, me disa zona të izoluara që mund të regjistrojnë deri në 40°C.
Sipas meteorologëve, ky gusht po shënon një devijim të ndjeshëm nga mesatarja, me temperatura që rezultojnë rreth 6 gradë më të larta se norma sezonale. Si pasojë, vendi po përjeton ditë të gjata nxehtësie të thatë dhe intensive.
