Shqipëria nuk po gjen qetësi nga publikimi i të dhënave sensitive, ku së fundimi kanë dalë “sheshit” numrat e telefonit.
“Homeland Justice” vijon me publikimin e të dhënave të tjera, ku këtë herë në shënjestër të hakerave iranianë kanë qenë numrat e telefonit të shqiptarëve.
Materiali 1.05 giga byte u publikua sot në mëngjes nga hakerat “Homeland Justice” në platformën e komunikimit Telegram.
“Linjat telefonike shqiptare kanë rezultuar të jenë mjete në shërbim të aktiviteteve terroriste të MEK në vende të tjera”, shkruajnë Homeland Justice në Telegram.
Kujtojmë se më herët hakerat iranianë kanë publikuar të dhënat e marra nga sistemi policor “Memex”, ku rezultonin emrat e të gjithë të skeduarve.
Në dosjet e publikuara nga “Homeland Justice” janë emrat e 105 mijë shqiptarëve që kanë probleme me drejtësinë, ndërsa në fund të çdo faqe të secilit dokument shkruhet “Albanian suspects”
Lidhur me publikimin e të dhënave sensitive të sistemit “MEMEX” ka reaguar policia e Shtetit. Sipas policisë nuk janë prekur apo dëmtuar të dhëna që administrohen në këtë sistem. Theksojmë se “MEMEX” njihet edhe si Sistemi i Menaxhimit të Informacionit Kriminal dhe është mjeti kryesore në punën e Policisë së Shtetit. “MEMEX” mban të dhëna sekrete të policisë mbi çdo eksponent kriminal. Edhe pse sulmi kibernetik ka bërë “hapa pas”, tashmë po vazhdojnë të “dalin sheshit” të dhëna që janë marrë nga sistemet e goditura.
