Shqipëria po zhvillon sot ndeshjen e fundit të Grupit B1 të Ligës së Kombeve kundër Ukrainës në stadiumin “Arena Kombëtare”.
Kombëtarja e drejtuar nga Sylvinho ka pasur një nisje katastrofale, duke pësuar dy gola brenda 10 minutave të para. Në minutën e pestë, Oleksandr Zinchenko shënoi golin e parë për Ukrainën, ndërsa vetëm pesë minuta më vonë, Roman Yaremchuk shtoi golin e dytë, duke i lënë pak mundësi Shqipërisë për të reaguar në fillim.
Pjesa e parë përfundoi me këtë rezultat të pastër 2-0 për Ukrainën.
Megjithatë, trajneri Sylvinho ka kryer tre zëvendësime menjëherë pas pushimit për të freskuar skuadrën. Nedim Bajrami zëvendësoi Jasir Asanin, Myrto Uzuni hyri në vend të Mirlind Dakut, ndërsa Arbër Hoxha u fut në minutën e 52′ për të zëvendësuar Ernest Muçin.
Ndryshimet kanë dhënë një impuls për Shqipërinë, dhe në minutën e 75′, Bajrami ka shënuar një gol pas një penalltie, duke ngushtuar diferencën e golave në 2-1.
Ndërkohë, pas golit të Bajramit, Shqipëria ka kërkuar me ngulm të rrezikojë më shumë dhe të kërkojë një barazim, ndërsa Ukraina ka ruajtur avantazhin dhe ka mbrojtur rezultatin.
