Nga Tirana në bregdet, Shqipëria po përballet me një valë të pazakontë virozash verore që kanë goditur sidomos fëmijët dhe të moshuarit. Vetëm në javën e dytë të gushtit, afro 9100 qytetarë kanë kërkuar ndihmë mjekësore për probleme me frymëmarrjen, duke e çuar vendin pranë kufirit të alarmit prej 10 mijë rastesh në javë – një shifër që rëndon drejtpërdrejt mbi kapacitetet e spitaleve.
Në qendrat shëndetësore dhe spitalet rajonale raportohen çdo ditë qindra vizita. Mjekët tregojnë se bronkitet, pneumonitë dhe laringitet janë në rritje të ndjeshme. Tek fëmijët dhe pacientët kronikë, një virozë që zakonisht kalon lehtë, po kthehet në rrezik real për komplikacione të rënda. “Jemi në vigjilencë të plotë. Situata epidemiologjike nuk është e mirë, ndaj duhet më shumë kujdes nga të gjithë”, theksojnë specialistët e ISHP.
Por pse po sëmuren kaq shumë njerëz në mes të verës? Mjekët tregojnë se kondicionerët dhe ndryshimet e menjëhershme të temperaturës janë ndër shkaqet kryesore. Qytetarët kalojnë orë të tëra në ambiente të ftohta artificiale dhe më pas ekspozohen papritur në vapën përvëluese jashtë. Edhe plazhi ka sjellë surpriza të pakëndshme: shumë pushues, sapo dalin nga uji i ftohtë, qëndrojnë gjatë me rroba të lagura ose në hije ku fryn erë, duke e bërë trupin më të ndjeshëm ndaj infeksioneve.
Në spitale shihen gjithnjë e më shumë prindër të shqetësuar që mbërrijnë me fëmijë me kollë, temperaturë dhe vështirësi në frymëmarrje. Në zonat turistike, ku fluksi i pushuesve është i lartë, mjekët thonë se urgjencat po mbushen çdo ditë e më shumë. Nëse ky trend vazhdon deri në fund të gushtit, rreziku për mbingarkesë spitalore, sidomos në QSUT në Tiranë, është i pashmangshëm.
Ekspertët u bëjnë apel qytetarëve të tregojnë kujdes më të madh: të përdorin kondicionerin me masë, të shmangin ekspozimin e trupit të lagur në erë, të kujdesen për hidratimin dhe ushqimin, por mbi të gjitha të mos neglizhojnë vizitën tek mjeku sapo shfaqen simptomat e para. Sepse kjo valë e re infeksionesh ka treguar se nuk është një “ftohje e zakonshme e verës”, por një problem serioz që po e vendos vendin përballë një testi të vështirë shëndetësor.
