Ministrja e Punëve të Jashtme, Olta Xhaçka ka bërë me dije se ditën e sotme kanë filluar intervistat për ekipin që do të përfaqësojë Shqipërinë në Këshillin e Sigurimit në OKB. Xhaçka bën me dije me anë të një postimi në Facebook se procesi do të përmbyllet në fund të javës për shkak të numrit të lartë të aplikimeve.
“Sot filluam intervistat me kandidatët për Ekipin që do të përfaqësojë Shqipërinë në Këshillin e Sigurimit, të cilët do të vlerësohen nga një Komision i përbërë nga disa nga diplomatët më me përvojë të MEPJ dhe një përfaqësuese e lartë e Këshillit të Ministrave.
Është dita e parë e një procesi që do të përmbyllet në fund të kësaj jave, për shkak të numrit të lartë të aplikimeve si nga përfaqësues të Shërbimit të Jashtëm, ashtu edhe nga kandidatë nga qytetarë e qytetare shqiptare nga mbarë bota, ekspertë e profesionistë, që kanë shprehur vullnetin të kontribuojnë duke përfaqësuar vendin e tyre si pjesë e Ekipit.
I falënderojmë të gjithë ata që kanë aplikuar për dëshirën dhe vullnetin e mirë. Ekipi që do të dalë në fund të këtij procesi do të jetë zëri dhe fytyra e shqiptarëve në Këshillin e Sigurimit prandaj do të bëjmë çdo gjë që shqiptarët të përfaqësohen në këtë moment historik vetëm nga profesionistët më të mirë!”, shkruan Xhaçka.
Kujtojmë që Shqipëria u zgjodh si anëtare e përkohshme e Këshillit të Sigurimit me 175 vota nga 117 që ishin të nevojshme, në 11 qershor. Këshilli ka prioritet paqen dhe sigurinë ndërkombëtare dhe ka të drejtën të dërgojë paqeruajtës në rajone të trazuara dhe të miratojë sanksione.
