Nga dita e hënë, në të gjithë territorin e Shqipërisë nuk do të lejohet më qarkullimi i monopatinave elektrike. Vendimi është marrë nga Policia e Shtetit, në bashkëpunim me Ministrinë e Brendshme, pas një takimi mes ministres Albana Koçiu dhe Drejtorit të Përgjithshëm të Policisë, Ilir Proda.
Sipas ministres Koçiu, ndalimi është i përkohshëm dhe do të qëndrojë në fuqi deri në hartimin e një kuadri të ri rregullator që do të përcaktojë rregulla të qarta për përdorimin e këtyre mjeteve.
“Sot i kam kërkuar Policisë së Shtetit që përkohësisht të mos lejojnë qarkullimin e monopatinave elektrike në rrugë. Gjithashtu dua të informoj të gjithë ata që e shohin monopatinën elektrike si mënyrë biznesi për dhënien me qira ditore, që të mos investojnë në këtë aktivitet. Lejimi do të bëhet vetëm pas përfundimit të këtij procesi dhe do të jetë i vlefshëm vetëm për përdorim vetjak,” deklaroi Koçiu.
Ajo shtoi se po përgatiten rregulla të reja që do të përfshijnë përcaktimin e korsive dhe hapësirave të lejuara, moshën minimale të përdoruesve, detyrimin për përdorimin e kaskës dhe ndriçimit, si dhe kufizimin e shpejtësisë.
“Derisa të hartohet një kuadër i plotë rregullator, interesi publik kërkon ndërhyrje të menjëhershme,” tha ministrja.
Nga ana tjetër, drejtori i Policisë së Shtetit, Ilir Proda, konfirmoi se operacioni për ndalimin e qarkullimit do të nisë të hënën, duke theksuar se gjatë vitit 2024 janë regjistruar 991 raste aksidentesh të lidhura me përdorimin e monopatinave elektrike.
“Ne kemi bërë një analizë të hollësishme dhe kemi arritur në përfundimin se përdorimi i këtyre mjeteve shkakton një rrezik të menjëhershëm për sigurinë publike. Vetëm gjatë vitit 2024 janë raportuar 991 raste aksidentesh, midis tyre edhe me pasoja fatale,” tha Proda, duke kërkuar mirëkuptimin e qytetarëve gjatë zbatimit të këtij vendimi.
