Ditën e sotme ish-ministri i Bujqësisë, Edmon Panariti, e quajti një “tallje” deklaratën e ministes së Financave, Delina Ibrahimaj mbi shifrën 7.5% të inflacionit në vend.
Ai tha se ishte një absurditet që vendi më i varfër në Evropë, të sfidonte të gjithë shtetet e tjera, përfshirë edhe anglinë ku së fundmi projeksioni ka prekur shifrat deri në 18%.
Postimi i Plotë nga Panariti:
Mos u tallni!
Me aritmetikën dhe logjikën e absurdes!
Kjo puna e inflacionit te ne i kapërcen kufijtë e absurdit dhe qesharakes.
Të pretendosh se inflacioni paska kapur te ne shifrën 7,5 % domethënë ndjeshëm poshtë mesatares Evropiane është një absurditet.
Është tallje!
Pra vëndi më i varfër në Evropë, i sfidon të gjithë duke filluar me Anglinë, ku projeksionet e fundit flasin për inflacion deri në 18 %, e në vijim sfidon Gjermaninë, Francën, e me radhë në këto kohë krize.
Shqipëria e para!
Sepse ka fuqinë më të lartë blerëse të mallrave të konsumit dhe të shërbimeve për qytetarët e saj.
Pra të parët në Evropë, për stabilitet dhe mirëqenie!
Po kush e mat dhe si matet inflacioni!
Inflacionin e mat qeveria!
Si e mat? Si të dojë ajo!
Duke numëruar ato që do dhe duke përjashtuar ato që nuk do.
Vetëm se , na shpjegoni pak me çfarë aritmetike, na del ky inflacioni i ulët, me naftën më të shtrenjtë në Evropë, me rritjen galopante të çmimit të ushqimeve, me dy tre fishimin e çmimit të plehrave kimike dhe farave për Bujqësinë, me çmimet e apartamenteve si në Vienë, e Berlin përkundrejt të ardhurave rrogave dhe pensioneve?
Rasti i Shqipërisë me këtë normë inflacioni, duhet të kthehet menjëherë në rast studimor..
Subjekt doktoraturash në financën dhe ekonominë e absurdes.
