Shqipëria vijon të mbetet e paprekur nga koronavirusi.
Ministrja e Shëndetësisë, Ogerta Manastirliu, deklaroi ditën e sotme, se janë testuar 42 persona, të cilët kanë rezultuar negativ.
“Asnjë rast i konfirmuar me koronavirus në Shqipëri. Janë testuar 42 raste të reja të cilat kanë rezultuar negativ. Po bëhet një punë voluminoze, intensive në pikat kufitare për të kontrolluar çdo udhëtar. Mbështes punën e urgjencës kombëtare dhe bashkëpunimin me epidemiologët e kujdesit shëndetësor për punën e tyre”, deklaroi Manastirliu.
Ministrja tha më tej, se po merren masa për të shtuar stokun ekzistues të materialeve të mbrojtjes personave, veçanërisht të personelit shëndetësor.
“Puna jonë e fokusuar në materialet për mbrojtjen e personelit shëndetësor është në front të parë”, u shpreh ajo.
Ndërkohë në rang global koronavirusi ka marrë 3200 jetë njerëzish, ndërsa numërohen 93.129 të prekur.
Vendi ynë fqinj Italia, po përjeton situatën më të vështirë në Europë, me 79 viktima dhe mbi 2500 të prekur.
Për fat të mirë në vendet e prekura nga koronavirusi po vihet re një trend në rënie i rasteve të reja me koronavirus, ndërsa është rritur edhe numri i të shëruarve.
