Nga sot futen në zbatim masat e reja të njoftuara dje nga Komiteti Teknik. Pas shifrave rekord të infektimeve në ditët e fundit, ministrja e Shëndetësisë dhe Mbrojtjes Sociale, Orgeta Manastirliu njoftoi kufizimin e fashës orare nga ora 20:00 deri në 06:00 të mëngjesit.
Një ndryshim tjetër u bë dhe për gjimnazet dhe universitetet. Prej mëse një viti universitetet e kanë zhvilluar mësimin online. Ndryshimi i ri është se dhe në shkollat e mesme do të ndiqet e njëjta procedurë. Ministrja Manastirliu tha se sezoni i provimeve do të zgjatet deri në 45 ditë.
Në mbledhjen e djeshme u vu theksi dhe tek rrespektimi i mbajtjes së maskave në ambiente publike, e detyrueshme kjo pavarësisht grumbullimeve ose jo.
SITUATA
Lidhur me situatën e COVID-19, në 24 orët e kaluara janë shënuar sërish një numër i lartë rastesh të reja dhe fatalitetesh. Nga rreth 4100 testime të kryera kanë rezultuar të infektuar 1143 persona.
Ndërkohë që në pamundësi për të fituar këtë betejë, kanë ndërruar jetë 15 pacientë. “Me gjithë përpjekjet e stafit mjekësor, 15 qytetarë e kanë humbur betejën me COVID-19 në spitalet COVID. 8 qytetarë nga Tirana, 1 qytetar nga Kavaja, 1 qytetar nga Durrësi, 1 qytetar nga Vlora, 1 qytetar nga Fieri, 1 qytetar nga Patosi, 1 qytetar nga Elbasani, 1 qytetar nga Korça, të moshave 53 -94 vjeç”, ka bërë me dije Ministria e Shëndetësisë. Ndjeshëm janë rritur edhe shtrimet spitalore. Aktualisht, në 4 spitalet COVID po trajtohen 483 pacientë, 37 në terapi intensive, nga të cilët 15 pacientë janë të intubuar.
