Deklarata e Ramës, lidhur me vendimin për të mbështetur Qeverinë e Kosovës sa i takon përballimit të krizës energjetike, është shoqëruar edhe me reagimin e Belinda Ballukut.
Kjo e fundit ka dalë sot në një deklaratë për media, teksa ka theksuar se Kosova do të marrë nga Shqipëria energji elektrike. Ashtu siç u deklarua edhe nga kryeministri Edi Rama, qeveria shqiptare do të furnizojë me energji për dy ditë për festat e fundvitit, shtetin e Kosovës.
Balluku:
Kemi arritur që të sigurojmë 7680KW për datën 31 e 1 të këtij fundviti. Kjo depozitë që do të dorëzohet brenda këtij muaji, do i kërkojmë të na kthehet gjatë stinës së verës, nga qershori deri në muajin shtator.
Ndërkohë kujtojmë se Rama, përmes një postimi në twitter, deklaroi se për dy ditë festë, Shqipëria do ti dhurojë Kosovës energji elektrike.
Postimi i Ramës:
Duke e ndjekur me shqetësim krizën e rëndë energjetike që ka prekur Kosovën kërkova sot nga ministria e Energjisë të vlerësojë çdo mundësi ndihme për qeverinë e Kosovës, që familjeve në Kosovë të mos u mungojë energjia elektrike në dy ditët e festës popullore të ndarjes së viteve. Shqipëria s’e ka aspak të lehtë mbrojtjen e vijueshme të familjeve e sipërmarrjeve të vogla nga dallga e tërbuar e krizës energjetike që po kërcënon çdo vend, por në sekëlldira të mëdha apo në gëzime popullore siç është Viti i Ri, ne s’mund të mos e ndajmë me Kosovën aq sa kemi.
