Që shqiptarët po ikin ditë pas dite dhe po e braktisin vendin e tyre, kjo gjë nuk përbën më lajm.
Jo më larg se sot paradite “GazetaReforma.com”, botoi një shkrim referuar të dhënave më të fundit të institucioneve europinae, për numrin e lartë të largimit të shqiptarëve nga vendi.
Por po aq fakt përbën edhe lajmi se, në Shqipëri po vijnë gjithmonë e më shumë grupe refugjatësh me qëllimin fillestar për të kaluar tranzit nëpër territorin tonë për në Malin e Zi dhe më pas drejt vende të BE-së.
Grupet e refugjatëve të cilët momentalisht nuk janë në numra të mëdhenj, gjithsesi në përpjekje për të kaluar tranzit Shqipërinë, po bllokohen në vendin tonë dhe kjo dalë ngadalë po na kthen nga një vend tranziti në një vend pritës.
Pak kohë më parë disa grupime qytetare dhe politike, larg forcave kryesore politike në pushtet, diskutonin faktin e një strategjie të huazuar të boshatisjes së Shqipërisë nga shqiptarët dhe të mbushjes së saj me refugjatë nga Azia dhe Afrika.
Këto zëra janë konsideruar shpesh nga qeveria si spekulativ dhe teoritë e tyre si konspirative, por duket se në fund të ditës diçka është e vërtetë edhe në këto teori.
Këtë e tregon më së miri angazhimi financiar i qeverisë shqiptare për të ngritur në disa zona të vendit, me paratë e buxhetit të shtetit, pra të taksapaguesve shqiptarë, disa kampe të mëdha refugjatësh për pritjen e flukseve migratore nga vendet tranzit.
Fondet e Ministrisë së Financave
Ndërtimi i strehëve të përkohshme nga pushteti vendor apo privatët, për pritjen e flukseve të pastrehëve dhe refugjatëve në rast të fatkeqësive natyrore, krizave humanitare dhe situatave të tjera emergjente, do të kryhet sipas kritereve të miratuara nga Ministria e Financave.
Në Fletoren Zyrtare, u botua udhëzimi i Ministrisë të Financave, që përcakton kushte të tjera që duhet të përdoren gjatë projektimit, ndërtimit, rinovimit, blerjes ose marrjes me qira të hapësirave për programin e strehëve të përkohshme.
Pushteti vendor, por edhe privati, që do të financojë ndërtimin e fjetoreve të përkohshme, duhet të plotësojë kushtet për sigurimin e hapësirës minimale për banor.
Kriteret
Sipas kritereve të reja të vendosura, hapësira minimale për person nuk mund të jetë më pak se 3,5 m2, duke përjashtuar hapësirën për shërbimet sanitare dhe të gatimit.
Sakaq në rastin e kampeve të strehimit apo të fjetoreve me numër të lartë banorësh, për çdo grup prej 15–60 banorësh, duhen të ofrohen hapësira dhe shërbime shtesë, si: për gatim, ngrënieje/mensa, për kujdes mjekësor apo psikologjik dhe për fëmijët.
Njësitë përgjegjëse, për ngritjen e kampeve të strehimit, gjithashtu duhet të zgjedhin zona që mundësojnë të paktën 30 m² sipërfaqe trualli për banor, si dhe drenazhim të lehtë dhe sipërfaqe toke të përshkueshme. Pjerrësia e rekomanduar është nga 1% deri në 5%.
Udhëzimi thekson se, vendosja e strehëve të përkohshme bëhet në hapësira, që plotësojnë kushtet për hapësira private dhe higjiene, mbrojtje ndaj zjarrit dhe evakuim të lehtë.
Strehët e projektuara, të ndërtuara ose të përshtatura për programin e strehëve të përkohshme, sipas ligjit “Për strehimin social”, mund të jenë struktura të posaçme, ndërtesa të përshtatura, si dhe ndërtime të përkohshme që mund të montohen, çmontohen dhe transportohen sipas nevojave.
Tendat, shtëpizat e parafabrikuara, strehët e ndërtuara me materiale lokale etj. Janë, gjithashtu, disa nga format alternative të ndërtimit që mund të përdoren për të ofruar strehë të përkohshme.
/GazetaReforma.com/
