Trajneri i Kroacisë, Zlatko Dalic, doli në konferencë për shtyp pas barazimit 2-2 kundër Shqipërisë në ndeshjen e vlefshme për Europianin, duke pranuar se skuadra e tij nuk e kishte pritur një ndeshje kaq të vështirë.
“Ky është një turne në të cilin është e rëndësishme të kalosh grupin. Nuk e prisnim një ndeshje kaq të vështirë. Ndoshta do të dalim më mirë prej këtyre betejave,” tha Dalic, duke reflektuar mbi sfidën e fortë të ofruar nga Shqipëria.
Trajneri kroat vlerësoi motivimin dhe rrezikshmërinë e kundërshtarit në kundërsulm, duke theksuar problemet në pjesën e parë të ndeshjes. “Dy pjesë krejtësisht të ndryshme. Së pari përsëri keq, pranojmë gol dhe më pas nuk bëjmë dot asgjë. Kundërshtari është i motivuar, i rrezikshëm në kundërsulm. U vendosëm keq, u tërhoqëm dhe pësuam një gol.”
Megjithatë, Dalic mbeti optimist për të ardhmen e ekipit të tij në turne. “Gjëja më e rëndësishme është që ne jemi ende gjallë dhe se ndeshja e fundit vendos gjithçka. Ne jemi mësuar me rrugën e vështirë,” përfundoi ai.
Ky barazim i jep Kroacisë një mundësi për të avancuar, por gjithçka do të vendoset në ndeshjen e fundit të grupit. Shqipëria, nga ana tjetër, merr pikën e parë në grup dhe do të përballet me Spanjën në ndeshjen e fundit, duke kërkuar të sigurojë një vend në Europian.
