Shqipëria u zgjodh ditën e sotme anëtare e përkohshme e Këshillit të Sigurimit të OKB-së me 175 vota. Pas këtij vendimi ka folur edhe ministrja e Jashtme, Olta Xhaçka e cila ka thënë se me nje plan të mirë dhe ekipin përfaqësues mund të kontribuohet në zgjdhjen e disa problematikave globale.
Ajo tha se prioritet do të jetë edhe çështja e Kosovës dhe do të punohet për rritjen e numrit të shteteve që e njohin. Xhaçka tha se Shqipëria do të bëjë çmos që çështja e Kosovës të rivihet në vëmendje të Këshillit të Sigurimit.
“Duhet të kemi pritshëmri realiste për atë që ne mund të arrijmë në këtë tryezë të vendimmarrjes globale. Me një plan të mirë pune me strategji dhe objektiva të qartë dhe ekipit që do të na përfaqësojnë të kontribuojmë në zgjidhjen e disa problematikave globale.
Çështja e Kosovës dhe rritjes së numrit të njohjeve është objektiv strategjik dhe me interes madhor i Shqipërisë dhe politikës së jashtme të Shqipërisë. Pavarësia e Kosovës është jo vetëm interes kombëtar por edhe kontribut për paqen dhe sigurinë në rajon.
Ky qëndrim do të mbetet i pandryshuar dhe jo vetëm tani, por edhe gjatë 2 viteve të pjesëmarrjes në KS. Dua ta them se Shqipëria dhe ne do të bëjmë çmos që çështja e Kosovës të rivihet në vëmendje të KS dhe kjo do të jetë një prioritet i rëndësishëm. Ne mbështesim dialogun Kosovë-Serbi” tha Xhaçka për VOA.
Ministrja komentoi edhe urdhrin e Biden që e futi Shqipërinë në listën e vendeve të Ballkanit Perëndimor për bllokimin e pasurive të individëve që sipas Departamentit të Thesarit Amerikan kanë cenuar stabilitetin në Ballkanin Perëndimor.
“Unë nuk di se cfarë mund të bëjë SHBA pas këtij vendimi por besoj që duhet parë në këndvështrimin e një mbështetje nga SHBA për të qenë krah për krah shqiptarëve”, tha Xhaçka.
