Sot futemi në ditën e 25-të që Shqipëria është mes zjarresh.
Vatrat e zjarrit janë riaktivizuar ndërsa rreziku për banesat ende nuk ka kaluar për shkak të trungjeve të pemëve që vijojnë të digjen. Aktualisht në territorin e Bashkisë Mirditë janë aktive dy vatra zjarri, njëra në zonën e Thirrës njësia administrative Fanë, ndërsa tjetra ndodhet në fshatin turistik Katund i Vjetër.
Vatrat e zjarrit në malin e zonës së Molungut dhe Kryezez të fshatit Katund i Vjetër vijojnë të jenë aktive. Teksa vijon puna intensive e forcave zjarrfikëse dhe atyre ushtarake, gjatë ditës së sotme mungon ndërhyrja nga ajri.
Zjarri vijon të jetë aktiv edhe në zonën e Molungut në Mirditë, por fatmirësisht është shmangur rreziku nga banesat. Ditën e djeshme në fshatin Molung, flakët u afruan drejt banesave, ndërsa nisi dhe evakuuimi i disa familjeve. Në rrezik dje ishte edhe fshati turistik “Katund i Vjetër”, ndërsa sot situata është nën kontroll. Megjithatë në terren ndodhen forcat e ushtrisë dhe zjarrfikësit të cilët po punojnë për të shmangur çdo rrezik të mundshëm. Një zjarr sakaq ka rënë edhe në murin rrethues të gardës së Republikës, te kodrat e Liqenit Artificial.
Banorët kanë kërkuar përforcim të ndërhyrjeve nga ajri për shkak se ndërhyrja nga toka është e pamundur. Forcat zjarrfikëse dhe të ushtrisë ndodhen në terren duke bërë verifikimet e duhura në afërsi të banesave, të cilat janë më të rrezikuara nga zjarret.
