Dosja e të voglës Bleona Mata të zhdukur tashmë prej 9 vitesh nuk dihet se në çfarë sirtari të hetuesve tanë ka përfunduar, por një lajm i mirë për familjarët e të miturës vjen nga Britania.
Drejtori i CRCA-së, Altin Hazizaj ka bërë me dije se javën që vjen, Policia Britanike, Qendra Britanike për Personat e Humbur dhe BBC do të nisin hetimet për gjetjen e Bleonës së vogël.
“Ndërkohë që javën e ardhshme së bashku me Policinë Britanike, Qendrën Britanike për Personat e Humbur dhe BBC do të shpallim kërkimin për Bleonën në Mbretërinë e Bashkuar. Ne urojme qe të kemi të dhëna të reja për Bleonën”, shkruan Hazizaj në Facebook.
Jo më larg se dy ditë më parë, është publikuar një foto se çfarë pamje mund të ketë Bleona tashmë 16-vjeçare sot dhe është shpërndarë në të gjitha mediat vendase dhe ato të huaja, por ende pa asnjë rezultat.
Ekspertët ndërkombëtarë amerikanë në bashkëpunim me alo 116, linja kombëtare e Këshillimit për fëmijët realizuan pamjen e Bleonës sot, me foto nga nëna babai dhe vëllai i saj më i vogël, në përafrimin që ajo ka me familjarët e saj.
“Ndërkohë ne jemi duke punuar edhe me Kompaninë Globale AMAZON që programi i tyre i mirënjohur i inteligjencës artificiale të kërkojë në web çdo foto të mundshme të Bleonës, bazuar tek identikiti i saj i ri”, shkruan Hazizaj.
